Që nga data 8 maj e këtij viti, Elhami Hajdari është pezulluar nga pozita e kryeshefit të Agjencisë për Zhvillim në Ministrinë e Bujqësisë, Pylltarisë dhe Zhvillimit Rural. E pezullimi i tij është bërë nga ministri i Bujqësisë, Nenad Rikallo, sipas të cilit arsyeja ishte e lidhur me korrupsionin.

Mirëpo, Gjykata Themelore në Prishtinë ka lëshuar një aktvendim përmes së cilit shfuqizon vendimin e Rikallos duke kërkuar kthimin e Hajdarit në punë
Njoftimin për suspendimin nga detyra e kryeshefit të Agjencisë për Zhvillim në Ministrinë e Bujqësisë, ministri i kësaj të fundit, Nenad Rikallo, e kishte quajtur lajm të mirë për të gjithë fermerët e Kosovës.

Sipas Rikallos, vendimi për suspendim ishte i lidhur me korrupsion.

“Pezullimi bëhet për shkak të mos bashkëpunimit, koordinimit, mos ardhjes në takime punuese të ftuara nga Kabineti i Ministrit dhe moszbatimit të politikave të përbashkëta bujqësore të përcaktuara nga Qeveria e Republikës së Kosovës përkatësisht Kabineti i Ministrit të Ministrisë së Bujqësisë, Pylltarisë dhe Zhvillimit Rural”, thuhet në vendimin e ministrit serb për pezullim të Elhami Hajdarit.

Mirëpo, Hajdari pohon se vendimi për pezullimin e tij nga puna nuk është i drejtë, pasi sipas tij, minstri Rikallo e ka përkrahur kompaninë “Extra Frut Fillings”, në të cilën është përfaqësuese bashkëshortja e ministrit, Biljana Rikallo.

“Vendimi se për çfarë gjoja jam suspenduar nuk është i vërtetë. Ministri bën vendim për ta përkrahur “Extra Frut Filling” e cila ka marrëveshje me një kompani nga Serbia që përfaqësuese është gruaja e tij, Biljana Rikallo”, ka thënë Hajdari për Express
Ai ka pohuar se do të kthehet në vendin e tij të punës, pasi nuk do të lejojë që ta largojë nga puna padrejtësisht.

E për këtë, Hajdarin po e përkrah edhe Gjykata Themelore në Prishtinë, e cila ka lëshuar një aktvendim përmes së cilit tregon se e shfuqizon vendimin e ministrit Rikallo për suspendim nga puna të Hajdarit, duke kërkuar kështu rikthimin e tij në punë.

“Caktohet përmbarim ndaj debitorit të përmbarimit Ministria e Bujqësisë, Pylltarisë dhe Zhvillimit Rural, që ta shfuqizojë Vendimin me numër KM/132/18 të datës 10.05.2018, i nxjerrë nga Ministri i Ministrisë së Bujqësisë, Pylltarisë dhe Zhvillimit Rural. Gjithashtu obligohet debitori i përmbarimit që kreditorin ta kthejë në vendin e punës në pozitën Kryeshef Ekzekutiv në Agjencinë për Zhvillimin e Bujqësisë me të gjitha të drejtat dhe obligimet e caktuara me Vendimin numër 06/81 të datës 23.03.2016, duke bërë kompensimin e shumës së ndaluar të pagës në lartësinë prej 50 % nga data 05.05.2018deri në zbatimin e këtij vendimi”, thuhet në aktvendimin e lëshuar nga Gjykata Themelore në Prishtinë.

Ka katër muaj që u shkarkua nga posti Elhami Hajdari pasi kishte refuzuar t’ia paguante jashtëligjshëm 400 mijë euro një biznesi që kishte raporte afariste me gruan e ministrit serb, Nenad Rikallo.

Të ashtuquajturat fakte nga ministri i Bujqësisë, Nenad Rikallo, që çuan deri te shkarkimi i kryeshefit ekzekutiv të Agjencisë për Zhvillimin e Bujqësisë, Hajdari, u shfuqizuan edhe nga Këshilli i Pavarur i Mbikëqyrjes.